Lansa Programa Embaixadór Turizmu Timor-Leste

Inisiativa formasaun sertifikadu ida atu haforsa servisu ba kliente, profisionalizmu no koñesimentu kona-ba destinu iha setór turizmu no otelaria — partisipante na'in 59 kompleta ona sesaun dahuluk sira iha Dili, ho alvu partisipante besik 300 tan to'o Setembru.

Ministériu Turizmu no Ambiente lansa ona Programa Embaixadór Turizmu Timor-Leste, inisiativa formasaun sertifikadu ida ne'ebé iha objetivu atu haforsa servisu ba kliente, profisionalizmu no koñesimentu kona-ba destinu iha setór turizmu no otelaria. Programa ne'e fó apoiu ba traballadór sira ne'ebé serbisu direta ho vizitante iha setór públiku no privadu atu reprezenta di'ak liu Timor-Leste no fó esperiénsia ho kualidade ba vizitante sira.

Programa ne'e responde ba nesesidade atu iha kapasidade otelaria ne'ebé metin liu no komprensaun ne'ebé luan liu kona-ba importánsia turizmu nian ne'ebé sae ba ekonomia Timor-Leste nian. Programa ne'e fó formasaun prátika kona-ba kuidadu ba kliente, komunikasaun, profisionalizmu, serbisu hamutuk, no koñesimentu kona-ba patrimóniu, kultura no fatin atrativu Timor-Leste nian.

Programa formasaun ba loron ida ne'e hahú iha loron 1 no 2 Juñu iha Dili Convention Centre, ho partisipante na'in 59. Sesaun formasaun seluk tan sei realiza husi Jullu to'o Setembru 2026, ho alvu partisipante besik 300 ba faze tuirmai.

Programa ne'e dezenvolve husi Ministériu Turizmu no Ambiente no implementa husi formadór esperiente sira husi Pro-Ema Restaurant School iha Dili, tuir orientasaun no akompañamentu husi Ministériu. Rejistu la selu buat ida, no kustu hotu ba partisipasaun direta, inklui materiál formasaun nian, Ministériu mak kobre.

"Programa Embaixadór Servisu Turizmu forma parte husi planu formasaun ne'ebé luan liu Ministériu Turizmu no Ambiente nian atu haforsa kapasidade tékniku no kapasidade servisu ba kliente iha setór turizmu tomak," komenta Antonio da Silva, Diretór Jerál Turizmu. "Liuhusi investe ba ema sira ne'ebé reprezenta Timor-Leste loron-loron, Ministériu hakarak hasa'e kualidade servisu, hadi'a esperiénsia vizitante nian, no fó apoiu ba kresimentu sustentavel turizmu nian nu'udar prioridade nasionál."

Ba informasaun tan kona-ba programa ne'e no atu rejista ba sesaun sira tuirmai, kontaktu Ministériu Turizmu no Ambiente iha [email protected].